Печать
Просмотров: 4799

АКАФИСТ СВЯТИТЕЛЮ ИОАННУ МИТРОПОЛИТУ ТОБОЛЬСКОМУ И ВСЕЯ СИБИРИ ЧУДОТВОРЦУ

КОНДАК 1

Избра́нному от Бога во святи́теля Це́ркве правосла́вныя, житие́м Свои́м и труда́ми вели́кими просвети́вшему па́ству Черни́говскую и Тобо́льскую, в земли́ Сиби́рстей просла́вленному чудотво́рцу, митрополи́ту Иоанну, воспису́ем похва́льная. Ты же, святи́телю, сию́ похвалу́ от нас гре́шных приими́ и свое́ю моли́твою сердца́ наша благода́тию Бо́жиею согре́й, да со умиле́нием зове́м ти:
Радуйся, Иоа́нне, святи́телю и всея Сиби́ри чудотво́рче.

ИКОС 1

Ангелом ра́дование был еси́ святи́телю, егда́ во отрочестве и ю́ности усе́рдно изучению молитв церко́вных и посеще́нию хра́мов Бо́жиих прилежа́л еси́. Мы же воспомина́юще таково́е твое житие, си́це с любо́вию восхваля́ем тя:
Радуйся, страны́ Украинския прозябе́ние.
Радуйся, гра́да Не́жина ча́до богоизбра́нное.
Радуйся, роди́телем твои́м утеше́ние.
Радуйся, бли́зким твои́м назида́ние.
Радуйся, под се́нию оби́тели Киево-Пече́рския воспита́нный.
Радуйся, от ю́ности святы́й подви́жниче.
Радуйся, о́браз чистоты́ и целому́дрия яви́вый.
Радуйся, го́рняго оте́чества дости́гнути жела́вый.
Радуйся, Иоа́нне, святи́телю и всея Сиби́ри чудотво́рче.

КОНДАК 2

Ви́дя яко христиа́не от за́поведей Бо́жиих отступа́ют и делам тьмы рабо́тают ты, преподо́бне, тща́тельно изуча́л еси́ сло́во Бо́жие и получи́в в Пече́рстей Ла́вре зва́ние пропове́дника, сам, благода́тию Бо́жиею води́мый, усе́рдно поуча́л еси́ и́ноков и мирски́х люде́й по за́поведям Бо́жиим житие́ свое́ устроя́ти и Бо́гу взыва́ти: Аллилу́иа.

ИКОС 2

Ра́зум тво́й умудряя словесы́ Боже́ственными, пребыва́я по Апо́столу в них, ты, святи́телю, да́нную ти от Бо́га му́дрость не скрыва́л еси в себе́, быв наста́вником шко́лы духо́вныя, любо́вь к сло́ву Божию и в сердца́х ю́ношей возгрева́л еси́ и их же в па́стыри посвяща́л еси́, назида́тельные во сла́ву Бо́жию созида́я своя творе́ния. Восхваля́юще твое́ вели́кое трудолю́бие, та́ко воспева́ем тебе́:
Радуйся, неле́ностный ю́ношей учи́телю.
Радуйся, словеса́ Бо́жия в сердца́ их влага́вший.
Радуйся, я́ко в келе́йном уедине́нии сна очи́ма и ве́ждома дрема́ния твои́ма не дава́л еси́.
Радуйся, я́ко моли́тве и писа́нию творе́ний твои́х, нощны́е часы́ посвяща́л еси.
Радуйся, я́ко моли́тве Иису́совой обуча́лся еси́.
Радуйся, я́ко благода́тных озаре́ний сподо́бился еси́.
Радуйся, ангелом собесе́дниче.
Радуйся, преподо́бных сожи́телю.
Радуйся, Иоа́нне, святи́телю и всея Сиби́ри чудотво́рче.

КОНДАК 3

Си́ла благода́ти Бо́жией прису́ща бе тебе, Свя́тче Бо́жий, и вси зря́ще твое́ подви́жническое житие́ и твои́м сла́достным поуче́ниям внима́юще, ра́довахуся и восхваляюще Го́спода, да́вшаго Тебе́ таковыя дарова́ния, воспева́ху Ему: Аллилу́иа.

ИКОС 3

Име́я от Го́спода дар благовествова́ния, ты, Бо́жий уго́дниче, свои́ми назида́тельными труда́ми му́дро опроверга́л еси́ лати́нския заблужде́ния и миря́н в свои́х поуче́ниях науча́л еси́ тве́рдо уклоня́ться от католи́ческих пре́лестей. За такову́ю-то му́друю борьбу́ твою́ с католи́ческим злове́рием, восхваля́ем тя та́ко:
Радуйся, я́ко и́стины ве́ры правосла́вныя разъясня́л еси.
Радуйся, я́ко све́том правосла́вия я́рко свети́л еси́.
Радуйся, святи́телю, я́ко в се́рдце твое́м духо́вныя ну́жды чад твои́х носи́л еси́.
Радуйся, я́ко твои́ми писа́ньми богосло́вскими сердца́ правосла́вных умиля́л еси́.
Радуйся, я́ко в опроверже́ние лати́нской е́реси зело́ потруди́лся еси́.
Радуйся, лати́нских ересей и обы́чаев неща́дный обличи́телю.
Радуйся, я́ко вели́им трудо́м о Боже́ственном мироуправле́нии ю́жнору́сский кра́й обогати́л еси́.
Радуйся, я́ко Киево-Печерскую Лавру проповедническими трудами украсил еси.
Радуйся, Иоа́нне, святи́телю и всея Сиби́ри чудотво́рче.


КОНДАК 4

Бу́рю вели́ких смуще́ний во и́ноческом от ю́ности зва́нии претерпе́л еси, преподо́бне. Непреста́нною же моли́твою, посто́м, всено́щным бо́дрствованием, псалти́ри чте́нием побежда́л еси́ вся ко́зни вра́жия и Го́споду, дарова́вшему ти побе́ду над страстьми́ и искуше́ниями, взывал еси: Аллилу́иа.

ИКОС 4

Слы́шаще поуче́ния твоя́, чита́юще богоглаго́ливыя писа́ния твоя́, та́кожде житие́ твое́ ви́дяще, и́ноцы Ла́вры Пече́рския и вси ве́рнии людии восхваля́ху тя та́ко:
Радуйся, изря́дный пропове́дниче.
Радуйся, покая́ния учи́телю.
Радуйся, му́дрый обличи́телю людски́х поро́ков и страсте́й.
Радуйся, проповедниче любви́ Христо́вой.
Радуйся, к бе́дным и ни́щим любо́вь пробужда́вый.
Радуйся,твои́м нищелю́бием до́брый о́браз всем показа́вый.
Радуйся, ве́рный Це́ркве правосла́вныя служи́телю.
Радуйся, христиа́нскаго смире́ния до́брый учи́телю.
Радуйся, Иоа́нне, святи́телю и всея Сиби́ри чудотво́рче.

КОНДАК 5

О Богоуго́дном житии́ твое́м слы́шав, и наро́дной молве́ о твоем назида́тельном пропове́дничестве внима́я, святи́тель Черни́говский Феодо́сий восхоте́ тя, преподо́бне, к своему́ архиере́йскому престо́лу прибли́зити и соде́ла тя нача́льником Еле́цкия оби́тели и в сан архимандри́та возведе́, да бу́деши и зде, в Черни́гове, до́брым изъясни́телем сло́ва Бо́жия и со все́ми иноками оби́тели усе́рдно Господу воспева́ти да бу́деши: Аллилу́иа.

ИКОС 5

Уви́девшие твое́ назида́тельное житие́ и твои́ми поуче́ниями наслаждавшиися оби́татели гра́да Черни́гова всею душе́ю тя, святи́телю, возлюби́ша и по блаже́нней кончи́не святи́теля Феодо́сия единоду́шно восхоте́ша тя прее́мником почи́вшаго в Бо́зе святи́теля ви́дети и Святе́йший патриа́рх Адриан, призна́вши тя досто́йным, соде́ла тя, архиепи́скопом Черни́говским. Мы же прославляя Го́спода, соде́лавшаго тя А́нгелом Черни́говския Церкви, та́ко тя ублажа́ем:
Радуйся, я́ко чу́днаго святи́теля Феодо́сия па́стырския труды продолжа́л еси́.
Радуйся, я́ко в се́рдце твое́м све́тлый о́браз сего святи́теля вы́ну име́л еси́.
Радуйся, я́ко в сме́ртной боле́зни твое́й у того́-же святи́теля благода́тной по́мощи проси́л еси́.
Радуйся, я́ко святи́тель Феодо́сий Свои́м предста́тельством у престо́ла Госпо́дня от одра́ боле́зни тя возста́ви.
Радуйся, я́ко по повеле́нию того-же святи́теля Боже́ственную Литургию в полном здра́вии соверши́л еси́.
Радуйся, я́ко в наро́де ве́ру во свя́тость своего предшественника утверди́л еси.
Радуйся, я́ко служение святительское достойно восприял еси.
Радуйся, я́ко сла́вныя дела́ Госпо́дня прославля́л еси́.
Радуйся, Иоа́нне, святи́телю и всея Сиби́ри чудотво́рче.

КОНДАК 6

Вропове́дником жи́зни ева́нгельской сло́вом и де́лом, яви́лся еси́, святи́телю, егда́ архиере́йское служе́ние во гра́де Черни́гове проходи́л еси и вси твои духо́вныя ча́да в тебе́ вели́каго моли́твенника, до́браго наста́вника и му́драго архипа́стыря ви́деша и благода́рно о тебе́ Го́споду взыва́ху: Аллилу́иа.

ИКОС 6

Возсия́л еси́, святи́телю, в Черни́гове твои́ми неуста́нными во сла́ву Христа́ труда́ми. И́бо усе́рдно с вели́ким умиле́нием соверша́л еси́ слу́жбы церко́вныя и си́ми слу́жбами и поуче́ниями твои́ми привлека́л еси́ в хра́мы Бо́жии моля́щихся мно́жество, и сего́ ра́ди от твои́х чад духо́вных слы́шал еси́ похвалы́ таковы́я:
Радуйся, па́стырю наш добрый.
Радуйся, учи́телю златослове́сный.
Радуйся, я́ко но́вых хра́мов и и́ноческих оби́телей создателю.
Радуйся, уста́вов церко́вных блюсти́телю.
Радуйся, я́ко неради́вых па́стырей и иноков вразумлял еси́.
Радуйся, я́ко о вдовах и сиротах душе́ю боле́л еси́.
Радуйся, я́ко ми́лостынею нищих оби́льно снабжа́л еси́.
Радуйся, я́ко и па́стырей учи́тельных поставля́л еси́.
Радуйся, Иоа́нне, святи́телю и всея Сиби́ри чудотво́рче.

КОНДАК 7

Хотя́ житие́ свое́ устроя́ти по за́поведям Бо́жиим ты, святи́телю Иоа́нне, Всесвято́й во́ле Боже́ственной вседу́шно покаря́лся еси́ и клевету́ и непра́вду, воздви́гнутую на тя злы́ми людьми́, с терпе́нием и благода́рностью к Бо́гу поне́сл еси́, и Го́споду, да́вшему тебе́ благода́тный дар терпе́ния в ско́рбех твои́х, взыва́л еси́ ра́достно: Аллилу́иа.

ИКОС 7

Ди́вное послуша́ние прему́дрой и всесвято́й во́ле Боже́ственной яви́л еси́, святи́телю, егда́ церко́вным священнонача́лием вы́зван был еси́ из благода́тныя со́лнечныя земли́ Черни́говския на да́льний север служи́ти Це́ркви Христо́вой в зва́нии митрополи́та Тобо́льскаго и всея Сиби́ри. Па́ства же Черни́говская с ве́лиею печа́лию прия́вши ве́сть о твое́м преселе́нии в хла́дную Сиби́рь, разлуча́яся с тобо́ю, та́ко восклица́ху тебе́:
Радуйся, послу́шный Го́споду ра́бе Христо́в.
Радуйся, архипа́стырю наш возлю́бленный.
Радуйся, в назида́ние нам твои му́дрыя творе́ния оста́вивый.
Радуйся, стро́гий и́ноческих обе́тов исполни́телю.
Радуйся, дете́й на́ших воспита́телю.
Радуйся, юных наставниче.
Радуйся, мужей похвало.
Радуйся, красото́ церко́вная.
Радуйся, Иоа́нне, святи́телю и всея Сиби́ри чудотво́рче.


КОНДАК 8

Стра́нно бе ви́дети, ка́ко ты, святи́телю Иоа́нне, в престаре́лых ле́тех страну́ Укра́инскую, в ней же роди́лся еси́ и до ста́рости Го́споду рабо́тал еси́, оставля́еши и в неизвестную тебе́ страну́ Сиби́рскую гряде́ши. Ты же, святи́телю, ви́дя сле́зы твоея па́ствы Черни́говския, твои́м бо́дрым ду́хом учи́л еси́ твои́х чад духо́вных во всех путе́х жи́зни бы́ти послу́шным во́ле Бо́жией и за вся Го́споду воспева́ти: Алилу́иа.

ИКОС 8

Ве́сь живя́ в Го́споде, ты, святи́телю Иоа́нне, с све́тлым упова́нием на по́мощь Бо́жию до́лгим путе́м к свое́й но́вой па́стве прибы́л еси́. В Сиби́ри же твоя́ па́ства со умиле́нием взира́я на све́тлый лик ста́рца пра́веднаго, срета́ет своего́ но́ваго архипа́стыря восклица́ниями таковы́ми:
Радуйся, я́ко долготы пути к нам не убоя́лся еси́.
Радуйся, я́ко ста́рческую, духо́вную му́дрость в наш град прине́сл еси́.
Радуйся, но́вый руководи́телю наш к небе́сному ца́рствию.
Радуйся, му́дрый наста́вниче.
Радуйся, я́ко на конец жития твоего́ к нам прибыл еси́.
Радуйся, ста́рче пра́ведный.
Радуйся, гряды́й к нам во и́мя Госпо́дне.
Радуйся, я́ко мы с любо́вию срета́ем тебе́.
Радуйся, Иоа́нне, святи́телю и всея Сиби́ри чудотво́рче.

КОНДАК 9

Вся́кое жите́йское попече́ние отлага́я ты, преподо́бне о́тче наш, и в но́вом твое́м гра́де руко́ю твоею достига́я до жили́щ бе́дных и оби́женных, утеша́я скорбя́щих, снабдева́я вдов и сиро́т, благотворя́ и нисходя́ ра́достию исполня́л еси́ сердца́ неиму́щих, и́же от благода́рнаго се́рдца своего́ восклица́ху Го́споду: Аллилу́иа.

ИКОС 9

Вити́йствующий язы́к не мо́жет обрести сло́в досто́йных к изображе́нию твои́х до́брых по́двигов, я́же во сла́ву Бо́жию соверши́л еси́, Тобо́льский святи́телю, среди́ твоея но́выя па́ствы. Духо́вныя же ча́да твоя, ви́дяще, я́ко ты в ста́рческих ле́тех духо́вную ю́ность явля́еши, уразуме́ша в тебе́ но́вый сосу́д благода́ти Бо́жией и возсыла́юще благодаре́ние Го́споду за дарова́ние их стране́ такова́го свети́льника, восхваля́ху тебе́ ра́достно:
Радуйся, в моли́тве пла́менный.
Радуйся, в слу́жбах Церко́вных Ангел во пло́ти.
Радуйся, смире́нием Христо́вым бога́тый.
Радуйся, ди́вный безсре́бренниче.
Радуйся, чистоты́ серде́чныя храни́телю.
Радуйся, миротво́рче чудный.
Радуйся, весей и градо́в Сиби́рских ра́досте.
Радуйся, иноков учи́телю.
Радуйся, Иоа́нне, святи́телю и всея Сиби́ри чудотво́рче.

КОНДАК 10

Спасе́нию духо́вных чад твои́х усе́рдно рабо́тая, ты святи́телю Бо́жий, и о ины́х о́вцах, я́же не от двора́ Церко́внаго, ве́лие попече́ние име́л еси́, до́брых па́стырей во тьме язы́честей седя́щим лю́дем посыла́л еси́, да и во Христа́ неве́рующие науча́тся воспева́ть песнь хвале́бную Бо́гу: Аллилу́иа.

ИКОС 10

Стено́ю кре́пкою во испове́дании ве́ры правосла́вныя был еси́, всея Сиби́ри чудотво́рче, и в твои́х златослове́сных поуче́ниях изъясня́л еси́ па́стве твоей и́стины еди́ныя Христо́вы Апо́стольския Церкве и с любо́вию увещевал еси́ твои́х чад духо́вных, да ни в ма́лом чем отступа́ют от ве́ры правосла́вныя и по Церко́вному уче́нию житие́ свое́ да устрояют. И сам ты, святи́телю, на све́щнице Церко́вней поста́вленный, и в сло́ве и в де́ле Свет Ева́нгелия Христо́ва все́й твое́й па́стве явля́л еси́, и та, храня́ веру правосла́вную и житие́ по ве́ре устроя́я, со умиле́нием та́ко взыва́ет тебе́:
Радуйся, тве́рдый носи́телю правосла́внаго испове́дания.
Радуйся, усе́рдный ревни́телю благоче́стия.
Радуйся, па́стырю незло́бивый и трудолюби́вый.
Радуйся, я́ко шу́йца твоя не ведяще, я́же творя́ще десни́ца твоя.
Радуйся, да́нные тебе́ от Бо́га тала́нты усугу́бивый.
Радуйся, в ра́дость Господа твоего́ вше́дый.
Радуйся, до́брыми делы твои́ми Отца Небе́снаго просла́вивый.
Радуйся, благодать Духа Святаго в душе своей носивый.
Радуйся, Иоа́нне, святи́телю и всея Сиби́ри чудотво́рче.


КОНДАК 11

Пе́ние похва́льное приими́ от нас наш до́брый па́стырю и учи́телю. Вы́ну в уме и се́рдце твое́м па́мять сме́ртную нося́, ты, святи́телю, непрестанно ду́шу твою́ к пути невозвра́тному приготовля́л еси́, да со све́тлым лице́м предста́неши пред лице нелицеприя́тнаго Судии и Го́спода и со все́ми Святы́ми сподо́бишися во ве́ки воспева́ти Всеблаго́му Спаси́телю: Аллилу́иа.

ИКОС 11

Све́тло возсия́л тво́й ди́вный о́браз, святи́телю Иоа́нне, егда́ Господь воззва́ тя в Свои небе́сныя оби́тели. По соверше́нии Боже́ственной Литургии ты, святи́телю, за твою́ трапезу призвал еси́ и сослужи́вших тебе́ и бе́дных, Сам, не вкуша́я пи́щи, усе́рдно предлага́л угото́вленное. Сконча́вшейся же трапе́зе, удали́лся еси́ во свою моли́твенную ке́лию и, подо́бно святи́телю Росто́вскому Дими́трию, в ту же нощь склони́вшись пред ико́ною Богома́тери, пре́дал чи́стую ду́шу твою́ Го́сподеви. Умиля́ясь таково́ю твое́ю христиа́нскою кончи́ною сиби́рская па́ства твоя́ со слеза́ми возопи́ тебе́ такову́ю проща́льную пе́снь:
Радуйся, незабве́нный па́стырю наш, на па́жити слове́с Боже́ственных о́вцы твоя́ пасы́й.
Радуйся, святи́телю наш, христиа́нскою кончи́ною твое́ю свя́тость жития́ твоего́ я́сно всем показа́вый.
Радуйся, усе́рдный пропове́дниче, уста своя́ на земли́ замкну́вый, да ве́чно и́ми на небеси́ прославля́ти Го́спода сподо́бивыйся.
Радуйся, вели́кий нищелю́бче, сокро́вища твоя́ Го́споду чре́з ни́щих вручи́вый.
Радуйся, неле́ностный состави́телю трудо́в богосло́вских, ны́не очи́ма твои́ма Святу́ю Тро́ицу созерца́яй.
Радуйся, му́дрый учи́телю па́стырей и ю́ношей, в тре́тием небеси́ неизрече́нным глаго́лам внима́яй.
Радуйся, язы́ки Сиби́ри в Христо́ву Це́рковь приведый, в ра́дость Го́спода вше́дый.
Радуйся, под покро́вом Богома́тери все житие́ проше́дый и благода́тную кончи́ну пред Ея о́бразом получи́вый.
Радуйся, Иоа́нне, святи́телю и всея Сиби́ри чудотво́рче.

КОНДАК 12

Благода́ть Бо́жию в тебе́, святи́телю, почива́ющу, мы я́сно зри́м, взира́юще на честны́я мо́щи твоя́, поклоня́ющеся им в све́тлый пра́здник твой, усе́рдно благодари́м Го́спода за такову́ю ми́лость Сиби́рскому кра́ю и всему́ на́шему оте́честву. Ты же, Вели́кий Сиби́рский Чудотво́рче, приими от нас недосто́йных похвалы́ сия́ и испроси́ на́м у Го́спода сил твоему́ житию́ подража́ти и от всего́ се́рдца воспева́ти на́шему Спаси́телю небе́сную песнь: Аллилу́иа.

ИКОС 12

Пою́ще твое́ све́тлое житие́, святительския труды твоя́ воспомина́юще, ра́дуемся, я́ко Господь Бог в на́ше утеше́ние сохрани́ те́ло твое нетле́нным и да́ром чуде́с тебе́ обогати́, и мо́лим тя, святи́телю и всея Сиби́ри чудотво́рче Иоа́нне, испроси́ у Го́спода нам гре́шным жела́ние и си́лы Его́ спаси́тельные за́поведи исполня́ти, да прославля́ем и мы свое́ю жи́знию и́мя Отца́ на́шего Небе́снаго, Тебе же, те́плаго моли́твенника на́шего, восхваля́ти та́ко да бу́дем:
Радуйся, я́ко честны́ми твои́ми моща́ми в Соборном хра́ме гра́да Тобольска почива́еши.
Радуйся, я́ко от святых твои́х моще́й оби́льно исцеле́ния подава́яй.
Радуйся, врачу́ безме́здный, целе́бниче благосострада́тельный.
Радуйся, я́ко от многообра́зных неду́гов исцеля́яй.
Радуйся, в со́нных виде́ниях немощны́м явля́яйся.
Радуйся, гра́да Тобо́льска и всея Сиби́ри утвержде́ние.
Радуйся, богохрани́мому оте́честву на́шему вели́кий моли́твенниче.
Радуйся, мира христианского благодатный подвижниче.
Радуйся, Иоа́нне, святи́телю и всея Сиби́ри чудотво́рче.

КОНДАК 13

О вели́кий всея Сиби́ри чудотво́рче, святи́телю Тобо́льский Иоа́нне! Приими́ сие́ похва́льное пе́ние от нас, лю́бящих тя, недосто́йных раб твоих и испроси́ нам от Го́спода и Спаси́теля на́шего благода́тной по́мощи в на́шем со страстьми и похотьми боре́нии, да обновля́еми чи́стым покая́нием, обря́щем до́брую христиа́нскую кончи́ну и отве́т до́брый дади́м на Стра́шном суди́щи Христо́вом и во веки с тобо́ю и все́ми Святы́ми воспева́ти бу́дем Творцу́ и промысли́телю на́шему, Триеди́ному Бо́гу, ве́чную ра́достную песнь: Аллилу́иа.


СЕЙ КОНДАК ЧТИ ТРИЖДЫ.

ИКОС 1

Ангелом ра́дование был еси́ святи́телю, егда́ во отрочестве и ю́ности усе́рдно изучению молитв церко́вных и посеще́нию хра́мов Бо́жиих прилежа́л еси́. Мы же воспомина́юще таково́е твое житие, си́це с любо́вию восхваля́ем тя:
Радуйся, страны́ Украинския прозябе́ние.
Радуйся, гра́да Не́жина ча́до богоизбра́нное.
Радуйся, роди́телем твои́м утеше́ние.
Радуйся, бли́зким твои́м назида́ние.
Радуйся, под се́нию оби́тели Киево-Пече́рския воспита́нный.
Радуйся, от ю́ности святы́й подви́жниче.
Радуйся, о́браз чистоты́ и целому́дрия яви́вый.
Радуйся, го́рняго оте́чества дости́гнути жела́вый.
Радуйся, Иоа́нне, святи́телю и всея Сиби́ри чудотво́рче.

КОНДАК 1

Избра́нному от Бога во святи́теля Це́ркве правосла́вныя, житие́м Свои́м и труда́ми вели́кими просвети́вшему па́ству Черни́говскую и Тобо́льскую, в земли́ Сиби́рстей просла́вленному чудотво́рцу, митрополи́ту Иоанну, воспису́ем похва́льная. Ты же, святи́телю, сию́ похвалу́ от нас гре́шных приими́ и свое́ю моли́твою сердца́ наша благода́тию Бо́жиею согре́й, да со умиле́нием зове́м ти:
Радуйся, Иоа́нне, святи́телю и всея Сиби́ри чудотво́рче.

МОЛИ́ТВА

О, Вели́кий Сиби́рский чудотво́рче святи́телю Иоа́нне, со смире́нным се́рдцем и душе́ю умиленною, прино́сим мы гре́шнии, свои моли́твы тебе́, нашему отцу́ и молитвеннику. Виждь, святи́телю, я́ко беззако́ния на́ша превзыдо́ша главу́ на́шу и несть у нас спасения наде́жды. Помози нам, всея́ Сиби́ри чудотво́рче, от грехо́в на́ших изба́витися, моли Го́спода и Спаси́теля на́шего, да благода́тию Свое́ю возгре́ет Он в сердца́х на́ших тве́рдую ве́ру во вся и́стины на́шей Це́ркви правосла́вныя, да не поя́вится в душа́х на́ших лука́вых колеба́ний и сомне́ний в благотво́рности и спасительности всех за́поведей Бо́жиих.

А бра́тий наших, и́же по малоду́шию отступи́ша от Це́ркви Христо́вой, или рабо́тающе своим страсте́м, погуби́ша в себе́ ве́ру во спаси́тельность та́инств Церко́вных, да прии́мет Госпо́дь через до́брое покая́ние па́ки в лоно Це́ркве правосла́вныя.

Ей, уго́дниче Бо́жий, моли́ся за всех нас, и оте́чество на́ше, да изба́вит нас Господь от гла́да, губи́тельства и наипа́че от наше́ствия иноплеменников, да пребыва́я в ми́ре и тишине́ и угожде́нии Го́споду Богу, мы, после́дующе твоему́ Свято́му житию́, своею до́брою христиа́нскою жи́знию просла́вим нашего Господа и ве́чное спасе́ние улучим по ми́лости на́шего Спаси́теля. Ему́ же подоба́ет сла́ва, честь и поклоне́ние во ве́ки веко́в. Ами́нь.

МОЛИТВА СВТ. ИОАННУ НА ОБРЕТЕНИЕ МОЩЕЙ (29 ОКТЯБРЯ Н.С.).

В тяжкую годину бед и напастей, постигших Отечество наше от нашествия врагов, Господь яви тя, Святителю и Чудотворче наш Иоанне, яко Солнце пресветлое, согревающее и оживляющее скорбные сердца наша светом любви и милосердия твоего, разгоняющее облежащий нас мрак уныния, печали, скорби и страданий и веселящее надеждою на скорое успокоение, мир, тишину и безмятежие в земли нашей. Пробави милость тв/p#769;жия в сердцаnbsp;#769;сно зриp align="center"ою, отче святый, и впредь к нам грешным и недостойным, к земному Отечеству твоему ― державе Российстей, к стране Сибирстей и ко граду твоему и храму сему. Отпадшия соедини Святей Соборней и Апостольстей Церкви, заблудшия на путь правый настави, возгрей в хладных сердцах наших дух правыя веры, крепкия надежды и любви христианския. Помози нам быти верными и послушными чадами Святыя Церкве Христовой, старость поддержи, юныя уцеломудри, младенцы воспитай, сирыя защити, бедныя и немощныя посети твоею милостию, скорбящия утеши, малодушныя поддержи, болящия исцели твоею благодатию. Ей, просим, не отрини, святителю Христов Иоанне, грешнаго и смиреннаго моления нашего и услыши нас припадающих умиленною душею и сокрушенным сердцем пред пречистою ракою мощей твоих и святым образом твоим. Буди нам помощник и покровитель и в сей жизни и по отшествии из нея, да сподобимся и мы нескончаемыя блаженныя жизни, юже уготови Бог любящим Его, Аминь.

СОСТАВИЛ МИТР. ВАРФОЛОМЕЙ НОВОСИБИРСКИЙ 1946-1950ГГ.

Если заметили ошибку, выделите фрагмент текста и нажмите Ctrl+Enter